Masanga manene ma opposition na Ekolo Congo Démocratique (RDC) masakoli o'mokolo mwa mosala misato ete masangani liboke mpo na kotelemela makanisi ma kobongola Buku Likonzi, maye mapesami na president Félix Tshisekedi.
Balakisi bilongi ba mangomba ma lokola FCC ya mokonzi ya kala Joseph Kabila, Lamuka ya Martin Fayulu, Ensemble pour la république ya Moïse Katumbi, mpe masanga masusu lokola ya ADG ya Matata Ponyo mpe misusu basalaki lisakoli na bokutani na ndako ya misala mya CENCO na Kinshasa.
"Bana mboka, ntango ezali mabe, botelema!", elobaki na lifalance Me Devos Kitoko, kala mokonzi ya lisanga Ecide ya Martin Fayulu.
Emmanuel Ramazani Shadari ya PPRD mpe FCC alakisaki ete Buku likonzi eye ezali na esika ekomama na bapaya te kasi nab ana mboka mpe eteki soki moke te bonsomi ya mboka.
Kalaka mokambi ya PPRD akundoli ete Buku likonzi elobi ete bopesi eteni ya mabele na bapaya bokoki kosala soki moke longola soki bana mboka nbandimi yango na referendum.
Bayi opposition bakundoli ete mpasi eleki mingi na mboka bakisa bitumba mpe bozangi bokengi na moneyele mpe na west pene na Kinshasa. Balaki kotelemela bomeki bonso ya kobongola Buku likonzi.
Na ngambu esusu, bayi mangomba ma bomwana mboka lokola Lucha balaki milulu mya botelemeli mikolo mikoya.
Mposo mibale eleki, président Tshisekedi asakolaki na Kinsagani (Tshopo) ete akobengisa ba nganga mayele ya makambo manso mobu mokoya mpo na kokela Buku Likonzi ya sika.
Mpo na ye, Buku likonzi eye ezali kokonza mboka ekelamaki na Bapaya mpe libanda lya mboka.
Moknzi ya RDC abandela lisusu makanisi maye mokolo mwa mposo moleki na Lubumbashi (Haut-Katanga) epayi abetaki sete akoki kondima te Buku Likonzi eye ezali kopesa nzela ete eteni ya mabele epesama na ekolo ya bapaya.
Forum