Bakutanaki nsima na ngonga 72 motambwisi ya Assemblée nationale, Christoophe Mboso, apesaki bango mpo na mbala ya suka na ntina ya kozwa eyano.
Ngomba ya bayi CENCO (lisanga lya ba episkopo katoliko) na ECC (eyamba ya ba misioni) na eye ya biyamba motoba baye basilaki kopona Denis Kadima bazali kokoba kobwakana libanga.
"Tokotinda mokanda na motambwisi ya Assemblée nationale… Tosali mosala moye tondimi ete ezali malamu. Tomekaki komema bandeko ba biso koya ngambo na biso mpo ntango ezali koleka. Toboyi komema mokumba ya kolekisa ntango ya mabongisi kasi ezalaki pete te. Makambo masusu mazalaki. Totosi makanisi ma bandeko, mingi mingi ya CENCO na ECC," elobi prophète Dodo Kamba, motambwisi ya ERC (Eglise du réveil au Congo) na nkombo ya biyamba misusu mitano baye baponaki M. Kadima.
"Tondimaki biso mbanso ete tokopona moto azali na makoki mpe tosi toponi ye elongo," ekati prophète Kamba.
Biyamba motoba biye (ERC, Kimbanguiste, Armée du Salut, Orthodoxe, Communauté musulmane mpe ba indépendants) balobi basukisi awa mpe bakokomela Assemblée nationale.
Bayi ECC na CENCO bango bakobi na kokebisa ete procès-verbal ya boponi nanu etiami manzaka te.
"Bokutani bobongisamaki mpo na mikolo mibale, lokola ezali suka na mposo tosali mosala, nakozelaka ete président (Mgr Marcel Utembi) akoma lelo, mpe akozala na biso o’mokolo mwa yambo. Bokutani bosalamaki na kimya," eyebisi molobeli molandi ya likita lya bakambi, Pasteur Eric Nsenga ya ECC.
Biyamba motoba misusu balobi ebongisamaki te ete bokutani mosusu bosalama o;mokolo mwa eyenga.
Pene na sanza motoba mokoki wuto matata mpo na kopona mokambi ya CENI mazali.
Bayi politiki, mingi mingi bayi opposition mpe baboyi kopesa ya bango bankombo mpo na CENI mpe bazali kosenga boyokani ya banso na boponi mokambi ya CENI mpe na mbongwana ya mibeko ya maponami.
