"Tozali kondima ete bakambi ya ekolo bakotika te bobomami boye bozanga etumbu. Bato basali yango esengeli bafuta mabe na bango mokolo moko," elobi mwana moko ya zuzi Yanyi ntango azwaki maloba na milulu misalamaki lundi na Palais ya Justice na Gombe, na Kinshasa, epayi wapi nzoto ya mowei ememaki mpo na kozwa losako ya suka.
Zuzi Yanyi akufaki nsima na mokolo mwa mibale ya bosambisami ya Vital Kamerhe, Sammih Jamal mpe Jeannot Muhima mpo bopengwisami bwa misolo ya misala mpo na mikolo nkama ya bonzi ya Félix Tshisekedi.
Président Tshisekedi azalaki na milulu ya matanga, atikaki fololo mpe apesaki mpe apesaki nkondo Yanyi palata ya chevalier national ya ordre national Héros nationax Kabila-Lumumba.
Libota ya zuzi Yanyi eboyaki kondima bilembo ya autopsie mibale biye ministre ya mambi ma Bosembo asakolaki.
"Bato banso bayebi yango, ba rapports nyonso etalisi ete tata na biso akufaki na liwa ya Nzambe te," elobaki mwana ya zuzi Yanyi.
Kolanda ministre ya mambi ma Bosembo, autopsie elakisaki ete zuzi Yanyi akufaki nsima na kobetama bibotu na botu.
Nkondo Yanyi azalaki mpe na ngenge na nzoto na ye kasi akufaki na yango te, elobaki ministre ya bosembo.
Libota lya ye liboyaki yango mpe ezali kokoba kosenga bosembo.
