Bakambi ba Lamuka bandimi, na lieyebisi, ete boyangali lingomba na bango bokobanda kowumela sika sanza motoba.
Jean-Pierre Bemba ya MLC na Moïse Katumbi ya Ensemble pour la république bazalaki te milulu, balakisamaki bilongi kasi batiaki manzaka na liyebisi ya Lamuka.
Bakambi banei ba Lamuka balobi bakobunda mpo ete maponami ma mokonzi ya mboka masalema na bana banso ba ekolo mpo na mibu mitano mpe bokonzi boyeba kozongelama koleka mbala mibale te.
Baboyi boponami ya mokonzi mboka na Parlement.
Nzokande baike ya FCC (Front commun pour le Congo), lingomba lizali nsima na mokonzi ya kala Joseph Kabila, bazali kosenga na Parlement kondima ete maponami ma mokonzi ya mboka mobanda kosalama na Sénat.
Bakambi ba Lamuka basengi mpe mbongwana ya boyokani kati na ngambo inso esalama na misala mya mapona mpe batambwisi ya CENI baponama na lolenge esengeli.
Bakambi ba Lamuka bapesi maboko na Prix Nobel ya Kimya Dr. Denis Mukwege oyo baike babangisi nsima na kosenga botiami na mosala ya rappord mapping ya ONU mpe botiami bwa tribunal penal international mpo na RDC.
Bapameli kaniaka na mboka mobimba.
Bayokani mpo na bopesani ya bokambi ya Lamuka bosalama mbala moko mpe bozela te milulu songolo.
