Tribunal ya grande instance ya Kinshasa/Gombe ekateli ata moto moko te likambo mpe etiki bato banso basambakaki.
Mwasi ya nkondo gén. Deplhin Kahimbi, Brenda Nkoy, na mama bokilo wa ye, Scholastique Mondo, batikami.
Procureur akokaki te kopesa ata elembo moko mpo kalakisa ete mokumba ya mwasi ya nkondo mowei na liwa liye, elobi na AFP avocat ya Mme Nkoy.
Procureur asengaki etumbu ya liwa mpo na Mme Nkoy na mama wa ye, Mme Mondo, azalaki kofunda na koboma gén. Kahimbi.
Gén. Kahimbi, moko na baye bazalaki makonzi ya bokonzi ya Joseph Kabila, akutamaki akufa le 28 février 2020 mwa ntango nsima na kolongolama na ye na ebonga na ye.
Azalaki koyanola na Conseil d’état mpo na maye matali bokengi.
Matata mazalaki mingi mpo na ntina ya liwa lya ye.
Président Félix Tshisekedi alobaki ete bolukiluki bolakisaki ete amikangi nsinga na nkingo kasi molili motikali mpo na liwa lyango.
"Motuna motikali. Amibomaki to babomaki ye ?," ekomi Human Rights Watch eye esengi bolukiluki bokaba na misala mya bosembo.
Gén. Kahimbi azalaki na nse ya etumbu ya Union européenne na kofundama na kopekisa maponami mpe démocratie ntango ya bokonzi ya Joseph Kabila mpe na mbeba ya makoki mabomoto.
