Mokambi ya soda ya etuka ya Nord-Kivu apekisi bokotisi ya bilokolo binso kosalama na ndelo ya mboka Bunagana (Nord-Kivu) na Uganda ntango batomboki ba M23 bafungoli ndelo eye.
"Mbulamatari ya etuka ya Nord-Kivu eyebisi basali mimbongo (opérateurs économiques), ba commissionnaires ya douanes mpe bateki banso ete epekisami mpenza, kino mokano mwa sika mopesama, kokotisa to kobimisa biloko bya koteka na nzela ya Bunagana eye ezali na maboko ya badongolomeso ba M23 mpe basungi ba yango ba Rwanda," elobi na liyebisi lieutenant—général Constant Ndima Kogba, mokambi ya soda ya Nord-Kivu.
"Yango, moto nyonso oyo biloko bya ye, ezala ya lolelengi nini, bikokota na ndelo eye akozwama lokola moto ya mayuya mpe mopesi maboko na na banguna mpe ekopesa etumbu ya mobeko," ebakisi lieut-gén. Ndima.
Mokambi ya Nord-Kivu asengi na misala minso mya l’Etat na ndelo eye kosala elongo na bakokani ba yango ba Uganda mpo na kokokisa mitondo apesi.
Nzokande M23 esakoli ete efungoli lelo ndelo eye. Kasi mituka mibandi nanu te kotambola mpo na bitumba bizali nanu na bisika biike.
M23 ebotolaki Bunagana wuto le 13 juin lokola mpe mboka esusu.
Na bokutani na bango lelo lundi na Nairobi (Kenya), bakambi ba bikolo bya EAC / CEA (Lisanga lya bikolo bya Afrika bya Est) basengi na M23 kotika bitumba mpe kolongwa ba mboka inso ezwaki.
Bakambi ba bikolo biye bandimi kotinda na lombango mampinga ma bango mpo na kobundisa elongo basimba minduki mpe batombki banso bakokitisa bibundeli te na monyele ya RDC.