Etats-Unis ya Amerika ekebisi lisusu lisungi inso Rwanda ekoki kopesa M23 na bitumba batomboki baye bazali kosala na FARDC, na monyele ya Ekolo Congo démocratique. Molobeli ya mambi ma bikolo ma bapaya ya Etats-Unis, Ned Price nde alobaki yango lobi.
"Lisungi lya ekolo songolo na mangomba ma basimba minduki likoki kondimama soki moke te mpe tobandeli kokebisa bopesi maboko bonso ya Rwanda na M23," elobi Ned Price o'mokolo mwa yambo ya mposo.
Na sanza ya mwambe eleki, secrétaire d’Etat to ministre ya mambi ma Pabaya ya Etats-Unis, Antony Blinken asalaka mobembo na RDC mpe na Rwanda mpe akebisaki mpo na sango Amerika ezwaki, sango eye ezali koloba ete Rwanda ezali kopesa maboko na M23.
Antony Blinken asengaki Rwanda kotika lisungi lyango na M23 mpe na RDC kotika kopesa maboko na ba FDLR, batomboki ba Rwanda bazalaka na ngambo eye mpe bafundama na mpo na génocide tobomomi bonene ya Rwanda.