Limpinga lyoko lya OIF (Mabongisi ma Francophonie na molongo) lizali, wuta mokolo mwa 29 ya sanza ya zomi ya 2023 na mpokwa, na Ekolo Congo démocraituqe na ntina ya kotala lolenge misolo misalelamaki ntango ya Masano ma mbala libwa masalamaki na Kinshasa kati na sanza ya sambo ya mwambe eleki.
Misala mya nsango mya mokambi ya comité international ya Masano ma Francophonie masalamaki na engumba mokonzi ya RDC, Zeina Mina, mikundoli ete botindami bwa limpinga lya Francophonie bosalamai te mpo na makambo maye mabimisami na suka ya mposo moleki na ba réseaux sociaux maye mapameli bopunzami bwa misolo mya masano maye kasi botindami bobongisamaki wuta kala.
Zeina Mina ye moko alobaki o'mokolo mwa eyenga na mpokwa na bokomi bwa na Kinshasa ete limpinga lya Francophonie likomi na Kinshasa na commissaire oyo alandelaka bosaleli misolo mpo na audit ya misolo.
Mokolo mwa mposo moleki, ministre ya mambi ma misolo ya RDC Nicolas Kazadi alobaki ete misolo misalelamaki ntango ya masano maye mizalaki mbala sambo koleka miye mibongisamaki.
Wuta dollars millions ntuku minei misolo myango mikomaki bongo dollars millions nkama misato na ntuku mibale na minei, elobaki Nicolas Kazadi oyo apamelaki baye bakambi misala myango.
Na ngambo na ye, Isidore Kwandja, mokambi ya mabongisiami ya Francophonie na RDC ayanolaki na compte X to Twitter ya kala ete akamwame maloba ma ministre mpe akundolaki ete misolo mindimamaki na misala mikambaki masano miye mpe mindimamaki nsima mpe lokola na OIF mizalaki nde koleka dollars millions ntuku sambo.
Masanoma Francophonie maye masangelaki kosalama na 2019 kasi matindamaki na 2021 mpe lisusu na 2022, mpe nsima lisusu na 2023 mpo na COVID-19.
Masano mango masalamaki nsima na bobongisami ya makambo manso na lombango ntango ntembe ya bosalami bwa yango bozalaki kino na suka.