Mokonzi ya Ekolo France akoyamba o’mokolo mwa mosala minei mokoya mokokani wa ye ya Angola Joao Lourenço na masolo ma boyokani ya bikolo bya bango mpe ma makambo matali etuka ya Afrika mpe molongo.
Kolanda ndako ya mosala ya mokonzi ya France, masolo kati na Emmanuel Macron na Lourenço makosalama yambo ete mokonzi ya Angola azwa ebonga ya kokamba Union Africaine na sanza ya mibale ekoya.
Lourenço azali sika mobondi ya kimya ya matata kati na Kinshasa na Kigali mpo etali bitumba ya ba M23 baye Rwanda epesamaka maboko na monyele ya DRC.
Bitumba bizali kongala na monyele ya RDC epayi M23 ezali kokoba kobotola biteni ya mabele nsima na likita kati na bakonzi ya RDC Félix Tshisekedi na ya Rwanda Paul Kagame kozanga kosala na sanza ya zomi na mibale na Luanda mpo na kotiya manzaka na boyokani ya kotika bitumba.
M. Macron asalaki mobembo na Angola na sanza ya misato ya 2023 epayi asakolaki lisusu ete azali kopesa maboko na misala mya bobondisi Lourenço azali kosala.