Ekolo Rwanda esakolaki mwa ntango o’mokolo mwa mosala misato (15 janvier 2024) ete ezwi petololo na lac Kivu kasi ezongi nsima na maloba mango mpe esakoli été ezali nanu kaka na etapi ya koluka komona yango mpe ya basungi.
Mokambi ya Bureau ya Makele, Petololo mpe Gaz ya Rwanda, Francis Kamanzi ayebisaki na Parlement ete nsango elamu ezali ete ekolo eye ezwi petololo.
Nsima ya mwa ngonga Bureau yango ebimisaki liyebisi mpo na koloba ete ekomi nanu ntango te ya kondima mpenza ete petololo ezwami.
Bikolo nzinga nzinga na ba Grands lacs (Bitima minene) bizali na libaku lya makasi lya kozwa petololo na esika eye lokola ebombamelo ya petololo ezali na esika yango.
Rwanda ebimisaka gaz méthane na lac kivu wuta mwa kala kasi elukaka nde kotimola petololo.
Ebandaki kosolola na RDC mpo na yango kasi masolo mazali na nkwokoso mpo na bitumba biye bizali na monyele ya RDC.
Bureau ya Makele, Petolo na gaza ya Rwanda esakolaki yambo ete mabulu ma bobimisi petololo na ngambo ya Rwanda na lac Kivu mazali bongo zomi na misato kolanda maloba ma Kamanzi na nsango eye epesami na ba media ma ekolo Rwanda.
Rwanda ekabolaka lac eye na Ekolo Congo Démocratique.
Na ngambo ya Nord, na lac Albert… Uganda esi emona bitando mingi ya petololo. Kamanzi akundoli été nyonso ezali na eteni moko ya libwaku ya Rift epayi lac Kivu ezwami.
Rwanda elukaka petololo na lac kivu wuta koleka mibu zomi.
Na 2017, Rwanda na RDC basalaki boyokani. Na ngambo ya RDC, mabulu ma petololo mazali nde na bituka ya Virunga.
Kasi matata kati na bikolo bibale makoma mpenza makasi.