Bato babale bamonani kozala na Maï Maï bakangami ba minduki mya bango o’kati ya baye bazalaki kotelemela MONUSCO, esakoli lelo (6 décembre 2019) mokambi ya pulusu na engumba Butembo.
"Mpo na kosala botelemeli, esengeli kozala na minduki? Ba Maï Maï bazali kati na bilenge baye bazali kosala milulu niye. Tokangi mibale na bango kati na engumba. Bazalaki na minduki. Nakoyebisa bino mingi te sik'oyo mpo bolukiluki bozali kokoba," eyebisi colonel Richard Mbambi.
Ayebisi te motango ya minduki mizwami mpe lolenge nini ya minduki.
O’mokolo ya mitano, bavandi ya Beni bakitaki lisusu o’balabala mpo na kosenga ete MONUSCO elongwa na RDC. Bakangi nzela na bipekiselo mingi mpe batie moto.
Milulu miye mizali kosalema uto mposo mibale mpo na kopalela bobomami na Beni na ba ADF.
Bana ya territoire ya Beni bazali kopalela MONUSCO na koloba ete ezali kotika batamboki koboma bango.