Bato bayebani te babomi bato mwambe mpe bazokisi 18 basusu na butu ya mokolo ya minei na ya mposo na mboka Kinigi, na district na Musanze, na Rwanda, pene na ndelo na RDC.
Police ya Rwanda elobi na liyebisi ete "badongolo meso baye bayaki mingi mpenza na ba mbeli mpe machettes bakotaki na secteur ya Kinigi, na district ya Musanze, mpe babomaki mpe bazokisi bavandi."
Kolanda police, bato motoba bakufaki na machettes mpe na mbeli, babale nde na misasi.
Bato 18 baye bazoki bamemami na lopitolo.
Kolanda police, mampinga mpe misala ya bokengi bakitaki na lombango na esika yango pe bolukiluki ozali kosalama.
Esika yango eyabani na bapaya mpo na parc national ya ba volcans epayi wapi mikomboso bazalaka mpe na ngambo na yango ya RDC ezali na parc Virunga.
Mikolo mileki batomboki ya Rwanda bokotaki kuna, bawutaki RDC.