Bokengi

Conseil ya sécurité ebakisi mobu moko lisusu na Monusco

Ba soda ya Maroc na Monusco (Misala mya ONU na RDC) na Kibumba, na parc national ya Virunga, na Nord-Kivu, 22 février 2021.

Etinda ya Monusco, misala mya ONU ya koyikisa makasi na kimya na RDC, ebakisami mpo na mobu moko, kolanda mokano mwa Conseil ya sécurité lundi.

Balakisi bilongi ya bikolo zomi na mitano bizali kati na Conseil ya sécurité bandimi bobakisi mikolo myango bango banso.

Esalamaki na bosenga ya France.

Kolanda mokano mwango, Monusco ekokende lisusu kino le 20 décembre 2022 mpe ekozala na motango 14.160 ya basoda na ba policiers 2.001.

Kasi Monusco ekolongwa na Tanganyika na kati kati ya 2022 mpe ekobakisama na Ituri, Nord-Kivu mpe Sud-Kivu, bisika bitumba bizali nanu.

Conseil ya sécurité epesi longonya na boyokani kati na bakonzi ya RDC na Monusco mpe na bikolo nzinga nzinga.

Wuto le 30 novembre, mampinga ma Uganda mazali na mabele ma RDC epayi mazali, elongo na mampinga ma RDC (FARDC), kobundisa batomboki ya ba ADF, lingomba liwuta na Uganda.

Conseil ya sécurité elobi ezali malamu kopesana sango mpe esengeli misala myango misala eleongo na Monusco.

Monusco ezongeli kosala elongo na mampinga ma RDC nsima na koboyaka ntango bakonzi ya basoda batangama na mbeba batiamaki na kokamba bituka mpe bitumba na monyele ya mboka.