Bosembo

CPI etiki etumbu ya mibu 30 ya boloko mpo na Ntaganda

Bosco Ntaganda, elongi ezipami na masque, azali kolanda ekateli na ye na Cour pénale internationale, na Haye, Pays-Bas, 20 mars 2021. (Twitter/Cour pénale internationale)

Etumbu ya mibu 30 ya boloko epesamaki na Bosco Ntaganda, moko na bakambi ya basimba minduki ya kala na Ituri, etikali nsima na bosambisa ya kozongela na Cour pénale internationale, mardi na La Haye, Pays-Bas.

Cour pénale internationale etiki etumbu yango na suka ya bosambisami ya kozongela mardi na La Haye.

"Chambre ya appel ya CPI endimi motango mingi ya mikano ya kokweyisa ye na etumbu" mpe "endimi etumbu esakolamaki na chambre ya instance ya yambo", elobi zuzi Howard Morrisson.

Bosco Ntaganda, na mibu 47, akweyisamaki o’likambu na 2019 mpo na mbeba ya bitumba mpe ya bomoto.

Afundamaka na mbeba 18 lokola ya kozwa basi na makasi, kobengana bavandi na bisika na bango mpe koboma bato na bitumba ya basimba minduki na Ituri, kati na 1999 mpe 2003. Bato koleka 50.000 bakufaki mpe 500.000 bakimaki bisika na bango.

Bosco Ntaganda akomaki général na mampinga ma RDC nsima na bosangisami ya mangomba ya basimba minduki kati na mampinga FARDC.

Na bosambisami na ye, Bosco Ntaganda alobaki ete azali moyi Rwanda mpe sergent ya mampinga ya Rwanda.

Asambaki na Kinyarwanda.