Bokutani na bango bosalamaki nsima na boye na mokonzi mboka Félix Tshiskedi.
"Tondimi tokoba masolo mpo na kotala ndenge nini tokoki kosala mbongwana ya misala ya bokambi mboka eye ekopekisa ete tozongela maye maselemaki na 2018. Mingi mpenza, mbongwana ya Cour constitutionnelle, ya CENI mpe lisusu mpo ete mokonzi ya mboka atiya te na nse ya makolo maye misala minso ya l’Etat," eyebisi Pierre Lumbi, mokambi ya limpinga ya Lamuka na bokutani na M. Guterres.
Mpo na M. Lumbi, M. Guterres alobelaki bango mpo na bokutani bonso azali kosala na Congo démocratique banda mikolo misato ya mobembo na ye.
M. Lumbi alobi ete Lamuka elingi ezala kati na mbongwana ya misala eye boyokani CACH-FCC basakolaki.
"Tokanisi ete esengeli kosala mbongwana kasi yango ezala kaka te liakmbo ya bato ya ngomba moko. Esengeli esangisa ngambo nyonso ya ekolo ya Congo," ebeti mokoloto M. Lumbi.
Kolanda M. Lumbi, masolo na bango matalaki mpe bokengi na Beni (Nord-Kivu), na Minembwe (Sud-Kivu) na bisika bisusu. Balobelaki mpe bokono ye Ebola.
Yambo na yango, M. Guterres akutanaki na président Félix Tshisekedi.
M. Guterres alobi lisanga ya molongo likotika ekolo Congo démocratique te.
M. Guterres alaki, masolo na bapanzi sango, komatisa lisungi ya Monusco mpe boyokani na yango na mapinga ya ba FARDC mpe na misala ya bokengi ya Congo démocratique na bitumba na ba ADF na monyele RDC. Ayebisi ete amoni elikya ya bavandi ya monyele ya RDC ata bokono ya Ebola bobomi koleka bato nkoto mibale na koleka mobu moko.
Kalaka mokonzi ya ONU asali mikolo mibale na Monyele ya Congo démocraituqe.
Akutani mpe na Premier ministre Sylvestre Ilunga na Kinshasa. Ndenge moko mpe na mokambi ya Assemblée nationale.