Politiki

Lisa Peterson alobi USA ezali kosunga mpo mapponami masalama na 2023

Lisa Peterson, Sous-secrétaire adjointe ya mambi ma makoki ma bomoto, démocratie mpe mosala ya USA, na bokutani na bayi Assemblée nationale ya RDC na kinshasa, 18 juin 201. (Twitter/Ambassade Etats-Unis na Kinshasa)

Etats-Unis elaki kopesa maboko na maponami masengeli kosalama na 2023 na Ekolo Congo démocratique, mpo ete mazala na ntango, malamu, na pole mpe na bonsomi ya bato, elaki Sous secretaire adjointe Lisa Peterson na suka ya mobembo mwa ye na RDC.

Mme Peterson asukisi vendredi mobembo ya mikolo minei na RDC.

Mobembo yango mozalaki ya masolo ma yambo kati na Etats-Unis na RDC mpo etali makoki ma bomoto mpe démocratie.

"Tozali kosala ete maponami ma 2023 masalama na ntango, mazala malamu, ya sembo mpe ya démocratique. Nazali na masolo maye makoki kopesa nzela ete bato bayokana mpe totala ndenge ya kosunga bato bakozala na maponami mango," elimboli Mme Peterson na bokutani na bapanzi sango.

Mme Peterson alobi asololi na baye ya mbulamatari, ya opposition mpe ya société civile mpo na yango.

Kolanda maloba ma ye, Etats-Unis elaki mpe kotia mopesi toli ya lokumu mpo na kopesa maboko na mampinga ma Ekolo Congo démocratique mpo na matali sembo.

Mme Peterson alobi mpe ete Etats-Unis ekosunga na linaka lya million moko ya ba dollars ya Bureau ya mambi ma molongo mpo na ba stupéfiants (bangi na biloko ya lolenge wana) mpe na botiami na mosala ya mibeko (NL) mpo na kosunga police. .