Bayi Frdc balobi ete babomi na mokolo mwa lobi le 17 octobre basimba minduki motoba ya Mai Mai na mboka Kitakandi na 7 Km ya ville ya Butembo na province ya Nord Kivu, mpe soldat moko ya Fardc abomami na bitumba byango.
Lingomba ya basimba minduki ya ba Mai Mai bakotaki na cheferie ya Bashu na ngonga ya 23h mpe balingaki kobotola bisika ba Fardc bazalaki, elobi molobeli ya operation sokola1 Lieutenant Antony Mwalushay.
Sima ya bitumba, babenganaki bango mpe babomaki motoba na kati na bango, kasi soldat moko ya premiere classe ya ba Fardc akufaki na masasi. Alobi mpe lisusu ete bakangi mpe mosimba minduki moko mpe babotoli mandoki na bango. Lieutenant Antony Mwalushay alobi ete basimba minduki baye bazali ba Maï-Maï ya lingomba lya Baraka.
Maire ya ville ya Butembo commissaire supérieur principal Mowa Baeki Roger atelemeli bitumba biye mpe asengi na bilenge ya Butembo kosalisa bayi Fardc po na kolonga basimba minduki baye.
Bitumba kati na bayi Fardc na ba Mai Mai ekomi makasi mikolo miye pene pene na mboka Butembo. Mokolo mwa mposo moleki, basimba minduki basusu babomamaki na bayi Frdc na mboka Museya, na chefferie ya Bashu.
Basimba minduki basusu baye bayebani na kombo ya ba Leopards bazali kokotisa mobulu makasi mpe kobeta masasi zinga zinga ya mboka Chanika oyo ezali na ba Kilometele 30 pene na mboka Butembo.