Commandant ya police Jean-Baptiste Bukili andimi likambo yango mpe alobi ete akangi mpe apesi policière yango na misala ya bosembo.
"Elenge mobali ya mibu zomi na minei akufi na masasi policière abetaki ye pene pene," etatoli mokambi ya quartier Gervais Katembo.
Kolanda maloba ya chef ya quartier, batelemeli bazikisaki bureau ya police moko mpona na koboya bozangi bokengi.
Botelemeli bwango bosalamaki nsima na bato mabe kokota o’ndako na bato butu boleki pene na quartier Kisoko, mpe bamema biloko.
"Bavandi ya quartier balingaki kolanda bato mabe baye, police epekisaki bango. Yango nde epesaki bango nknda," elimboli M. Katembo.
Bilili ya elenge mobali oyo bitamboli mingi na ba réseaux sociaux. Bimonisi nzoto na ye na makila na ntolo, esika lisasi likotaki.
Mobulu mozalaki na Goma uto ntango likambo yango lisalemaki. Nzela ekangami mpe misala mitelemi.