Bakeli mibeko baike batunaki mituna nsima na malabo ma Azarias Ruberwa na libandela lya likita libengisamaki mpo na likambo litali milulu mya botiami bwa bougmestre ya Minembwe le 28 septembre 2020.
"Nakoloba na bosolo mpe na bozangi koyina bato songolo to pakala…, na ekolo na biso toyebi te lisanga (communauté) lya bato songolo to pakala kasi tolobaka ekolo (ethnie) to kabila (tribu)… Bato batelemelaki likambo lya commune ya Minembwe bazali baye bavandi na Uvira. Boyokaki te bankumu ya mboka, to episkopo ya Uvria, to basusu baye baboyi commune wana. Nga na kobenga yango te commune rurale kasi communautaire. Mpo na banani nde commune yango ekalama ?", emituni mokeli mobeko Eve Bazaiba, ya MLC.
Bakeli mibeko basusu lokola Juvenal Monubo babakwaki mbela ya kimya.
"Nazali koloba awa bo’ monzeneke mpo nakendaki kuna (na Minembwe). Bokati mboko (balakanisation) bozali te. Yango, esengeli tosala makasi mpo kobengana bobangi boye bozali na mitema mya biso mpamba te na kobanga eye, ekozala mpasi na kobatela mobimba ya ekolo ya Congo. Monguna ya Congo, ezali nde bobangi bayi Congo batie kati na bango, elobi mokeli mobeko Munubo.
Na malaoba azwaki na libandela lya likita lyango, M. Ruberwa alimbolaki ete ezali ye te nde esengeli ayanola mpamba te milulu mya kotiya bourgmestre ya Minembwe misalamaki na ministre procincial ya Sud-Kivu elongo na mokambi ya etuka ya Sud-Kivu baye bazali ba mbifo ya kosala yango.
M. Ruberwa akundolaki ete Minembwe ekelama lokola commune rurale wuto mibu mibale mpe mokambi na yango atiamaki wuto ntango wana kasi milulu mya bovandisi ye na ebonga misalamaki te.
M. Rubrwa asengi ngonga 48 mpo na koyanola mituna inso mpe alingi bato banso balanda yango na etando eke.