Kalaka mokonzi ya Assemblée abimisi liyebisi lya ye nsima na liye lya motambwisi ya Assemblée nationale, Jeanine Mabunda, kotelemisa misala minso ya ndako ya bokeli mibeko na ba commission banso kolanda mobulu mozalaki lundi.
"Mama na likambo se moko nde ekotalama na likita lyango, ezali : botiami ya Bureau kolonga mibu na ntina ya kotala mikanda ya kosenga bokweyisami bayi Bureau ya Assemblée nationale," ekomi M. Nguvulu.
Bayi FCC, lingomba lisangisa masanga mazali nsima na mokonzi ya kala Joseph Kabila, bapamelaki bayi CACH na balandi basusu ba président Félix Tshisekedi na kokanga na hôtel moko kalaka mokonzi ya Assemblée nationale mpo kondimisa ye na makasi kozwa mokanda ya kosenga bolongwi ya Bureau.
Samedi, boko na baye bazali kosenga bolongwi ya Mme Mabunda na bureau mobimba bakutaki ndako inso ya misala ekangama na Assemblée nationale.
Mobulu mobimaki lundi na likita Bureau ebengisaki. Bayi CACH babukaki ba kiti mpe mesa ya bakambi mpo na kopekisa milulu misalama.
Mpo na CACH, Mme Mabunda azali lisusu te na makoki ya kobengisa likita ntango mokanda mosengi bolongwi bwa ye mokotisami.
Boko na balandi ba CACH batindikaki bakeli mibeko na FCC kokota na ndako ya mosala na bango.
Kolanda mobulu yango, Bureau etelemisaki bokutani bonso mpe ekundili ete kaka Mme Mabunda nde azali na bokonzi ya kobengisa likita.
Lundi na mpokwa, bakeli mibeko ya CACH na baye balingi kosanga na liboke mokonzi ya mboka azali kosala bakutanaki na bokambami ya Jean-Marc Kabund mokambi ya UDPS, lisanga lya politiki lya présidemt Tshisekedi na ntina ya kobongisa nini bakosala mardi.