Likita lya ba episkopo Katoliko ya Ekolo Congo Democratique CENCO lipameli maloba ma vice-Premier ministre mpe ministre ya mambi ma Transport ya RDC Jean-Pierre Bemba kozanga loboko mpe kolukaka bitumba na biyano apesaki bapanzi nsango mikolo mibale mibaleki na Kinshasa.
Cenco epameli ndenge Jean-Pierre Bemba azali kobenga ba nganga Nzambe bayi politiki balataka Nzambala mpe ekundoli ete ba episkopo bazali na etinda ya kiprofeta mpo na kokebisaka mbeba ya bayi politiki lokola bomeki kobongola to kotiya Buku likonzi ya sika.
Ba episkopo balobi ezali kozanga bokebi mpe ekesi na bolamu ya likolo ya Ekolo.
Nzokande na maloba ma ye, Jean-Pierre Bemba ayebisaki bapanzi nsango ete sika ezali soko moke te likambo lya kotia Buku likonzi ya sika lokola basusu bazali kokanisa kasi ezali na makambo maike makoki kobongolama kati na yango.
Jean-Bemba mpe akundolaki eten a maloba ma ye, mokonzi ya ekolo Felix Tshisekedi alakaki polele ete ezali te mpo atikala lisusu na bokonzi mbala ya misato mpo Buku likonzi epekisi yango.
Cenco elobi mbulamatari epesaki ba diocese na yango misolo miye Jean-Pierre Bemba azali koloba te kasi kaka mwa ndambo mpe na bitemi mibale mpe misolo myango misalelamaki na mabongisi ma bomoi ya bana mboka.
Forum