Mokonzi oyo alongaki maponami na Ekolo Amerika, Donald Trump asakolaki mokolo mwa mosala misato moleki ete azali kokanisa kopesa ebonga ya mokambi ya VOA (Lolaka la Amerika) na moyi politiki mpe mopanzi nsango ya kala na Arizona, mama Kari Lake.
M. Trump asakoli na réseau social na ye Truth Social ete Mme Lake akopesama ebonga ya kokamba Misala mya nsango mipesamaka misolo na mbulamatari ya Amerika mpo na molongo, VOA.
Mme Lake azali na ngambo ya politiki ya mokonzi oyo aponami mpe azalaki mokambi linaka lya na Fox News Television na Phoenix, na état ya Arizona.
Mme Lake asala mosala ya mopanzi nsango mibu 27 yambo atika na 2021 mpo na kowelela ebonga ya moyangeli ya état ya Arizona.
Nsima na kolonga te maponami ya Sénat na 2024, Mme Lake alobaki Arizona ekoki kozala "momemi bendele mpo na politiki ya Amerika yambo". M. Trump akomaki mpe o mokolo mwa mosala misato ete akosakola kala te oyo aponi mpo na U.S. Agency for Global Media eye eyebani bo’ USAGM eye etalaka VOA mpe misala misusu mya nsango miye mipesamaka misolo na mbulamatari ya ekolo Amerika. Moto avandisamaka na ebonga eye aponamaka na mokonzi ya ekolo mpe esengaka bondimami ya Sénat. M. Trump alobi moto akopona bo’ PDG to mokambi akopona mpe akosala mosala mingi mpenza na Mme Lake.
PDG ya USAGM asalaka manso ete bapanzi nsango bakokisa etinda na bango ya kosala mosala mwa bango ya bopanzi nsango na lolenge londimama mpe ya solo na bikolo biye bizali na ba media ya bonsomi mpenza te.
Directeur oyo azali sika na ebonga ya kokamba VOA, Mike Abramowitz, atindaki email o’mokolo mwa mosala minei na basali na kolabaka ete atangaki lisakoli litali Mme Lake o’mokolo mwa mosala misato na mpokwa mpe abakisaki te nsango esusu likolo lya eye ebimisaki na ba réseaux sociaux.
"Na azali kozela bopesani bokonzi ya kimya ezala mpo na USAGM to VOA. Nazali kozela kosala elongo na mbulamatari ya sika mpe kolanda misala mikosalama" mpo na botiyami ya mokambi ya VOA, ekomaki ye.
Mobeko mobongolaki bokambi bwa Agence eye na 2020
PDG ya USAGM azali na bokonzi ya kopesa mosala to kolongola bakambi ba misala miye, kasi na nse ya mokano ya ngambo mibale molekisamaki na 2020, mbongwana ya bakambi mosala esengaka boponami na motango ya mingi ya baye bazalaka na Broadcasting Advisory Board, lisanga lya bayi nsomi na bopanzi nsango.
Lisanga lyango lizala na bato motoba baponama na mokonzi ya ekelo baye basalaka na bokonzi bolandamaka, elongo na Secrétaire d’Etat. Mosala mwa yango mozali kopesa malako na PDG mpo ete asala nyonso mpo na kotosa editorial ya bonsomi mpe alima ya mosala moye mpe basali, mpe ete lolenge ya malamu ya likolo mokokisama.
[[ https://www.ibab.gov/about-us/statute-bylaws-and-functions/ ]]
Na poste moko na etiyami na réseau social X, Mme Lake akomaki ete apesami lokumu ya koponama mpo na mosala mwa VOA. Asakolaki ete VOA ezali “esika ya litomba makasi ya kopesa nsango na molongo” eye etombolaka “democratie mpe solo”.
“Na bokambi na ngai, VOA ekozala na molongo mwa yambo na etinda na yango: kopesaka nsango ntango inso ya maye Amerika esalaka na mokili”.
VOA emekaki kozwa Mme Lake mpo na apesa mayele ma ye na esika asalaka bobeti ntangwa na ye, kasi eyano epesamaki te na makomi ma yango.
VOA epesaka nsango mposo na mposo na balandi 349 millions na nkota 49. Mokambi na yango oyo azali na ebonga, Abramowitz azalaki mokambi ya kala ya Freedom House mpe mopesi nsango mpe editeur na The Washington Post mibu 24.
[[ https://www.voanews.com/a/usagm-names-freedom-house-president-as-new-voa-director-/7577060.html ]]
Forum