Boko na bakeli mibeko bandimi ete Thomas Lubanga na limpinga lya bakambi ya kala basusu ya basimba minduki bakangami na bayi CODECO wuto mercredi na ntongo na mboka Bambu, na Ituri.
Molebeli ya Task Force, Pitchou Iribi andimi bokangami boye na liyebisi.
Na kati na bato bakangami, ezali na Thomas Lubanga, Germain Katanga mpe Floribert Ndjabu, baye bazalaka bakambi ya basimba mandoki ya kala mpe basambisama na CPI mpo na misala na bango ya bosimbi mandoki.
M. Lubanga atikamaki na CPI (Cour pénale internationale) le 15 mars 2020 nsima na kokokisa mibu zomi na minei ya boloko na Haye epayi akatelamaki etumbu bo' mokonzi ya kala ya lingomba ya basimba minduki UPC (Union des patriotes congolais) mpo na kozwa bana na lingomba lya ye mpe mpo na mbeba ya bomoto mpe ya bitumba.
Wuto mwa ba sanza, mbulamatari epesaki etinda M. Lubanga kokamba Task force to misala ya masolo na basimba minduki bazali nanu kobunda na Ituri, na ntina ya komema bango kotika bitumba.
"Tosimbi Thomas Lubanga na baninga baye ba task force mpo mokonzi ya soda ya Ituri lieutenant-général Johnny Nkashama atindaki ba hélicoptères kobeta biso bombes ntango tozalaki na masolo. Tobombi na bokengi kasi tokotika bango kaka soki mokonzi ya mboka andimi komikotisa na makambo maye mpe esengeli tosolola mpo batika baike ya ba Lendu bakangama," elobi molebi ya ba Codeco, na nkombo ya Basa, na mongongo mozali kotambola na ba réseaux sociaux.
Bakeli mibeko baike bandimi ete ezali solo ete Codeco ekaangi M. Lubanga na basusu.
VOA Lingala emekaki kobenda bakambi ya ba soda ya Ituri kasi bazwaki téléphone te.