"Attaque ya engumba Bukavu mercredi 3 novembre na baye babengami batomboki etiki bana ba RD Congo na mituna," elobi M. Fayulu na compte Twitter na ye.
"Tosengi enquête ya solo na ntina ya komema biyano na makambo mingi mazali na molili," ebakisi M. Fayulu.
Mokambi ya etuka ya Sud-Kivu, Théo Ngwabidje Kasi eyebisaki VOA Lingala molokolo mwa misato ete basimba minduki 38 bakangamaki mpe bibundeli bya bango bibotolamaki.
Commandant ya 33e région militaire, général Bob Kilubi Ngoy ye nde alobaki ete basimba minduki motoba bakufaki na ba policiers babale elongo na soda moko.
Kasi bayi ba hôpitaux babakisaki ete ndoto ya ba civili basato bakufaki na masasi mpe ememamaki kuna.
Basimba minduki bango balobaki bazali bayi lingomba CPCA-A64 (Coalition des partiotes congolais mpour l'application de l'article 64).
Mikolo mibale yambo na yambo na yango, CPCA etindaki mikanda na bakonzi ya bikolo lokola Etats-Unis, Grande-Bretagne, France mpe ya Union européenne mpo na koloba ete bazali kosenga bolongwi ya président Félix Tshisekedi oyo baboyi elonga na ye na maponami ma décembre 2018.
Lingomba lyango mpe lisengi bobimi mboka ya mokonzi ya kala Joseph Kabila, ya Monusco mpe ya babundi to ba mercenaires ya ba tutsi mpe Hutu ya Rwanda mpe Ouganda.
Bakambi ya province balobaki ete bolukiluki bozali kokoba.