Vital Kamerhe aponami wuta lobi lokola mokambi ya suku ya nse ya Ekolo Congo Démocratiki

Vital Kamerhe aponami wuta lobi bo’ mokambi ya Assemblée nationale ya Ekolo Congo Démocratique. Mokambi ya Union pour la nation Congolaise mpe moko na bakambi ba liboke Union sacrée pour la nation liye lizali nsima na président Félix Tshisekedi mpe Vice-Premier ministre mpe ministre ya Nkita ya mbulamatari eye ezali kobima, Vital Kamerhe aponamaki na bakeli mibeko nkama misato na ntuku sambo na libwa kati na nkama minei na mitano baye bazalaki na maponamai mango lobi loleki na Suku ya nse ya ndako ya bakeli mibeko na Palais du Peuple na Kinshasa. Na lisikulu lya ye nsima na koponama, Vital Kamerhe apameli bokoti na mboka ya commando eye emekaki kokweyisa bokonzi mpe elukaki koboma ye na libota lya ye mokolo mwa eyenga moleki. Alaki ete bozangi bokengi na monyele mpe sika na west bokozala mama na likambo ya mosala akosala. Asengi na bakeli mibeko komipesa kaka te na makambo matali boyokani kati na etuka ya Afrika mpe ya bikolo bya molongo kasi komipesa mpe lokola na makambo matali bozongi bwa kimya na monyele ya mboka. Vital Kamerhe azongi na ebonga ya mokambi Assemblée nationale mibu zomi na mitano nsima na kotika yango. Akambaki yango wuta 2006 kino 2009. Bato basusu mpe baponami na mabonga masusu ya bokambi Assemblée nationale lokola Jacques Ndjoli ya MLC oyo akomi rapporeur to mopesi nsango na ndako eye. Basi basatu mpe baponami. Dominique Munongo bo’ mopesi nsango molandi. Chimene Polipoli Lunda bo’ Questeure mpe Grace Neema molandi wa ye.